Psa 85 | MPS | STEP | Genuai Bidi, nago naga tǫba wiegi yai yali. Nago da Israel dabe ma tau selama, tama da bugagia mu bidibao.

Psalms 85

Bidigo gedu haluasa po weyu, te Godigo aga hani tonalumainu yai

1 Genuai Bidi, nago naga tǫba
wiegi yai yali.
Nago da Israel dabe ma tau selama,
tama da bugagia mu bidibao.
2 Nago naga we bidi dago dwai sęgę dagala sąnama,
tama dago yali sęgę sela sąwai dao.
3 Polobadu nago daba wado yali,
tiali goli, megi nago wado po ma wabeo.
Mu tama, nago daba haliga sębę yali,
tiali goli megi da, menio wali.

4 God, nago da ma selama, megi da, nago da te nagaba
odasa ma pao.
Ya, nago dabolo wado ma igio.
5 Magi yaliwe, te nago dabolo sesemane
wado iduaibawe?
Te nago wado po me sia sogobe da, agawe?
6 Nago dago bidibo ula ma dąų walao,
te nago we bidi dago te wiegi yai pemene elama,
tama nago nogi ugwaba saibao.
7 Genuai Bidi, nago dabolo te nago
da sesemane wei ebo ola mao,
tama da ma selama, te da bugagia bidaibao.

8 Eno te Genuai Bidi Godigo
pusubo poba olo muani.
Agai te wiegi yai nagame yai homu,
me te da bugagia bidabo po wali,
te dago polobadu yali dwai kolesagaba
da ma begasa pisąbaso da te tama tiaibao wali.
9 Mu tama, agai te agaba lotu weyu,
agai homu wali pabo we bidi dabe
ma sainu te sisi yalio.
Tama agai da ma selama, tama aga digi da dali dago
tǫde bidaibao.
10 Te sogo da, te we bidi dabego
te gasa bage wei mu elama,
tama wiegi yai kolesaga augwaliba yaibao.
Tama augwa dolasa bidiyu,
tama haliga nagame elama,
tama hodobo bugagia bidaibao.
11 Te tǫde te we bidi dabego
te Genuai Bidi wali mu paibao,
tama te dagalude Godigo augwali
doloba pai pedalumainu ilaibao.
12 Genuai Bidigo te da bugagia
bidimainu tau saibao, tama dago ebo sę dabe
te wiegi yai pedelaibao.
Tama dago tǫde te nai hauwa walaibao.
13 Genuai Bidigo te we bidigo doloba pai kolesaga
wali pomainu elama,
tama te tebogo te aga asabo sunumi dodolubo dao.